تركستان

أهلا
تركستان

هذا المنتدى خاص بالتركستانيين في السعودية أو مايعرف ب البخارية و عام لجميع من هم من تركستان و غيرها من البلدان و الدول من عالمنا التركي الكبير.


    تساؤلات عن التركستانيين و أتراك تركيا

    شاطر
    avatar
    Sultan Uyghur

    المساهمات : 101
    تاريخ التسجيل : 16/03/2010

    تساؤلات عن التركستانيين و أتراك تركيا

    مُساهمة  Sultan Uyghur في الإثنين مايو 17, 2010 12:35 am

    بس حبيت اسالك كم سوال على السريع

    دحين انت تقول انو احنا اتراك وانا مصدق دا الشي وانا عارفو من زمان طيب ليش علمنا ازرق وعلم تركيا احمر ؟؟

    غير كدا كلامنا نفس كلام الاتراك اللي تركيا الان ؟؟ غير كدا انا اعرف بخاريا اشكالهم كانهم صينين كيف كدا واحنا اصلا اتراك ؟؟

    واخر سوال دحين ليش سمو دولتنا تركستان وسمو تركيا بهدا الاسم يعني ليش ماخلو الاسمين كلها واحد

    -------------------------------------------------------------------------------------------------------------------------------------------------------

    رد على السريع لأن الشغل و الدراسة فوق راسي و ماني قادر حتى أحك شعر راسي و الأخبار المحزنة من بلدنا تخلي الواحد مايبغى يسوي شي, فنأسف على التأخير و زي ما قلت هذا رد سريع لأسئلتك و بعدين راح أرد رد مفصل مدعم بالصور.

    س- دحين انت تقول انو احنا اتراك وانا مصدق دا الشي وانا عارفو من زمان طيب ليش علمنا ازرق وعلم تركيا احمر ؟؟

    ج- احنا أتراك, أتراك تركيا يرجعو لينا مو احنا نرجع ليهم : ) لا تحسب انو هما أصلنا لأ هما جزء مننا و احنا أصلهم, تركيا الحالية ماكان فيها أتراك طيب ؟ و احنا في وسط اسيا كنا قبائل رحل وقامت قبائل من تركستان الشرقية و منطقة أوزبكستان الحالية بالرحيل لمنطقة الشرق الأوسط ووصلو تقريبا شرق تركيا الحالية, لقو معركة بين فريقين, ماكانو يعرفو مين اللي قاعد يتحارب فشافو انو في فريق قوي راح ينتصر على الضعيف فقامو من نخوتهم و شجاعتهم في نصر الضعيف دخلو في المعركة ووقفو مع الجيش الضعيف : ) ولمن انتهت المعركة بفوز الأتراك مع الفرقة الضعيف اتبين انو الفرقه الضعيف هما المسلمين العرب, فقام الخليفة العربي المسلم هداك الوقت بمكافئتهم وسمحلهم بالسكن في تركيا لكن كانت هاذي برضو خطة منه ومكر منه انو يحط هذولي الشجعان ويسكنهم في مكان بيون و بين الأوروبيين عشان يكونو زي الصد او الحماية لهم ومرت الأيام و انتشر الأتراك في كل تركيا الحالية وصارو جدا اقوياء و برعو في الجيش خصوصا لأن اصلا طبعنا و كل وقتنا حروب في وسط اسيا فكانت شغلة الجيش و الحروب هيا اللي نفهم فيها اكثر شي عشان كدا كان نص الجيش الأسلامي و معظم القادة يرجع اصلهم اتراك, طبعا ال عثمان اللي حكمو تركيا هما من القبائل اللي جت على تركيا و حكمت تركيا الى ان سيطرت على كل الشرق الأوسط وانشأت المبراطورية العثمانية التركية العظيمة اللي نشرت الأسلام الى قلب اوروبا الى ان اجتمعت عليها الدنيا و حاربتها الدول الأوربية و روسيا و قام العرب بالتحالف مع ال"الكفار" البريطانيين" و خانو "المسلمين" العثمانين بأسم العنصرية العربية و باع العرب فلسطين لبريطانيا, ضعف العثمانيين من هاذي الخيانات و طاح حكمهم فقام واحد اسمو أتاتورك انسان وطني قومي تركي وقاد الجيش لحماية تركيا من الهجوم اليوناني و الروسي و الأرمني اللي احتلو نص تركيا لكن بشجاعته هومهم كلهم, فكرو في اسم جديد بعد الخلافة العثمانية فقامو قالوة انو بمام انهم من العرق التركي و انهم من وسط اسيا فراح يسمو بلدهم "تركيا".

    بالنسبة للون الأعلام, الأتراك القدامي اللي هما أجدادنا الأويغور و الأوزبك و غيرهم كان عندهم نظام معين للجهات فكانو يرمزو للشرق باللون الأزرق و الغرب باللون الأحمر و الشمال باللون الأسود و الجنوب بالأبيض, لمن نجمع العالم التركي الكبير في خريطة وحده يعني تركستان الشرقية و أوزبكستان و كازخستان و قيرغيزيا و تركمنستان و أزربيجان و تركيا و سيبيريا و نص روسيا, فيكون الشرق هو تركيا عشان كدا لون علمهم أحمر بالأضافة انو يرمز لدماء الشهداء اللي حمو الوطن أيام اتاتورك, و علم الأويغور تركستان الشرقية أزرق لأن تركستان الشرقية تعتبر شرق العالم التركي الكبير بالأضافة الى ان الأزرق خصوصا هوا اللون المقدس عند أجدادنا لأنو يرمز للسما اللي كانو يعبدوها قبل الأسلام.

    س- غير كدا كلامنا نفس كلام الاتراك اللي تركيا الان ؟؟ غير كدا انا اعرف بخاريا اشكالهم كانهم صينين كيف كدا واحنا اصلا اتراك ؟؟

    ج- كلام العرق التركي كلو واحد, اللي غيرو مرور الزمن و دخول كلمات من لغات ثانية زي الفارسية و العربية و الروسية واختلاف اللهجات يعني طريقة نطق الكلام هوا اللي يخلي الواحد يعتقد انو كلامنا غير, اذا انتا كنت تعرف بخاري سواءا ايغوري او اوزبكي وتبغى تتعلم لغة اتراك تركيا فيبغالك بس اسبوع الى اسبوعين او ثلاثة بس عشان تتقن التركية : )

    بالنسبة للشكل ياعزيزي ليش قلت صينين ؟ ليش ما قلت مثلا اشكالهم زي اليبانيين او الكوريين, ترى اسيا كبيرة و مو بس الصينين اللي عايشين فيها : ) وانا ابصملك بالعشرة انو هذولي اللي تقول عليهم يشبهو الصينين ما يشبهوهم لأنو يتهيألك بس, وهذا مو زبنك طبعا لأنو الكل يعتقد كدا, شوف هذا الموضوع راح اخصصلو موضوع منفرد لوحدو راح ابين فيه حتى بالصور الفرق في الشكل : ) لكن الأن ركز معايا, تقدر تقول الفرق بين أهل الجنوب و أهل اليمن ؟ بالملابس صح لكن بالشكل ؟ باللهجه صح لكن بالشكل ؟ هذا مو مثال على كلامن لأن السعوديين و اليمنى كلهم من عرق واحد, خلينا نجي لحكاية ليش اشكالن غير اتراك تركيا, طيب قارن شكل اللبناني ب السعودي مثلا او بالسوداني ؟ كلهم شكل لكنهم كلهم عرب, الشكل الأصلي للأتراك هو شكلنا اللي هوا شكل الأويغور و شرق أوزبكستان اما اللي اتغيرت اشكالهم زي اتراك تركيا و غيرهم فمن مخالطتهم بالناس المحليين في بلدهم و طبعا ما ننسى تغير العامل المناخي اللي يغير الشكل و لون الجلد كمان, بالنسبة للصينين فما لنا دخل عرقي بينهم ابدا ابدا فكيف نشبههم ؟!! لبس سعودي لبس باكستاني وقل لواحد اوروبي هذا ايش ؟ راح يقلك باكستاني, وصحيح حتى الفرس يشبهو العرب لكنهم مالهم دخل في بعض و الحقيقة انو مايشبهوهم لكن الناس ماتعرف تفرق لأنو لو تبغى تدقق فراح تفرق, وبعدين ياخي اسيا زي ماقلتلك كبيرة جدا و فيها اعراق و اجناس كثيرة فحرام اننا نقول كلهم يشبهو بعض غلط.

    العيون الصغيرة مو كلها وحده, احنا عيوننا صغيرة لكن جدا مختلفة عن شرق اسيا و الصين و غيرها ونقدر نقول عليها وسط و هذا الكلام راح اشرحلك هوا مزبوط لاحقا.

    س- واخر سوال دحين ليش سمو دولتنا تركستان وسمو تركيا بهدا الاسم يعني ليش ماخلو الاسمين كلها واحد

    ج- اسم تركيا جاوبتلك عليه و اسم بلدنا معناه بلاد الترك و عشان كذا اتراك تركيا سمو بلدهم تركيا لأنهم يرجعو مننا.

    والأسمين نفسم الشي تركستان= ترك +ستان , تركيا= ترك+يا , و"ستان" و "يا" تعني بلد.

    وانشاءالله يجي اليوم اللي تتحرر فيه تركستان الشرقية بلاد الأويغور و يتوحدو في دولة واحدة مع الكل أوزبكستان الى سيبيريا الى تركيا كلها تحت مسمي واحد.

    شكرا على أسئلتك اللي تدل على انك مهتم و تبغى تعرف كل شي, اقرى اللي كتبتو واي شي ماوضحتلو لك مزبوط اسئل, وزي ماقلت لك راح افصل كل اسئلتك و ادعمها بالصور.

    لا تدقق على الحروف الناقصة : )

    سلطان أويغور
    avatar
    Sultan Uyghur

    المساهمات : 101
    تاريخ التسجيل : 16/03/2010

    رد: تساؤلات عن التركستانيين و أتراك تركيا

    مُساهمة  Sultan Uyghur في الإثنين مايو 17, 2010 12:39 am

    بس انا اللي قاهرني انو اكتر الناس في السعودية مايصدقوا انو البخاريين اصلا اتراك ولمن نقلهم احنا البخاريا اتراك

    يقولوا انتو كدابين بتنسبوا نفسكم لتركيا هما يقولو كدا عشان شافو لميس ومهند و الشباب الحلوين والمزز اللي في

    المسلسلات التركية المعروضة على القنوات العربية ،، وهما اصلا دول اصلهم مو تركي هما اصلا من اوروبا بالتحديد

    من المانيا

    ---------------------------------------------------------------------------------------------------------------

    لا تنقهر, المهم انو انتا عارف الحقيقة والبقية اللي ينكرو جهلة او ناكريين للحقائق لغرض خبيث في نفسهم, معلومة انو اتراك تركيا يرجعو اصلا أويغور و أوزبك"بخارية" من تركستان معلومة ماقد سمعها كثير من العرب عشان كذا تكون غريبة شوية عليهم, ما في احد كثير يحب التاريخ عشان كذا في معلومات خاطئة كثير بتتداول بين الناس, خذلك مثلا كيف بعض الشباب السعودي اللي متعصب جدا لقبيلته و كل الناس الباقية في نظره طرش بحر, اسأله جدك ال 14 ايش اسمو ؟ اسأله ايش تاريخكم ؟ اسأله انتا من اعرب العاربة و لا المستعربه ؟ ماراح يقدر يرد ! مثال ثاني الدولة السلجوقية و الخوارزمية و المماليك و العثمانيين وغيرهم من قادة الحيوش زي الظاهر بيبرس و غيرهم من العلماء اللي سكنو الشرق الأوسط و حكمو العرب و غيرهم, ناس كثير ماتعرف انهم اصلا يرجعو من عندنا ! حتى اتراك تركيت نفسهم اللي مايعرف التاريخ راح يقولك لأ احنا مانرج من وسط اسيا ! بخارية السعودية اغلبهم مايعرفو هاذي المعلومة ! حتى اغلب الناس في اوزبكستان مايعرفو انو تركيا ترجعلهم وهذا من الأحتلال الروسي الحقير اللي غير في التاريخ.

    لكن اللي يعرف التاريخ و ماضيه راح يتقبل هاذي المعلومة بكل صدر رحب, واللي يقول انو نتلزق في اتراك ترككيا عشان المسلسلات ! والله شي مضحك و حتى مجرد الرد يكون خسارة, اذا قابلت ناس زي كذا حاول تفهمهم برواق واذا اصرو على العناد اضحك و امشي لأن اللي مايتقبل الحقائق فهو مريض نفسي.

    لو تشوف في سفارة تركيا في الرياض و القنصلية في جدة كيف يعاملوني لمن يعرفو اني أويغور, بكل احترام وتقدير, الشباب التركي اللي يشتغل في السعودية في المطاعم والصالونات وغيرها لمن يعرفو اني اويغور شوف كيف بس اطلع من عندهم ببلاش , في تركيا قنوات كاملة تتكلم عن تركستان 24 ساعه في تركيا لمن رحت شوف بس لمن يعرفو اني اويغور والله انو في واحد رجال كبير بكي لمن عرف اني اويغور وقال انتو الأصل و سامحونا اننا تركناكم لوحدكم تواجهو الصين و وروسيا, في كل المنشأت التركية الحكومية احنا لنا معاملة جدا جدا خاصه.

    مختصر الكلام انو بما انك تعرف الحقيقة فلا تهتم و لاتنزعج من كلام الناس الجهلة, انتا حاول توصل الحقيقة و امشي وراسك مرفوعه لأن في الحقيقة كل هاذي الدول اللي في الصورة باللون الأحمر بلدك و ناسهم ناسك.

      الوقت/التاريخ الآن هو الأربعاء يوليو 26, 2017 6:46 am